дэкан гістарычнага факультэта
ў 1973—1986 гг.
Нарадзілася 29 студзеня 1928 г. у в. Гаркавічы Сакольскага павета Беластоцкага ваяводства (Польшча). У кастрычніку 1939 г. выехала ў г. Беласток, дзе вучылася да ліпеня 1941 г. У 1948 г. скончыла Нясвіжскае педвучылішча і ў ліку 5 % навучэнцаў (за выдатную вучобу) была накіравана ў БДУ, які скончыла ў 1953 г. Вучылася ў аспірантуры па кафедры гісторыі КПСС БДУ, паспяхова завяршыла навучанне ў 1957 г. З 1957 па 1963 г. знаходзілася на партыйнай рабоце. У кастрычніку 1963 г. пераведзена на працу ў БДУ — на кафедру гісторыі КПСС. У 1965 г. І. О. Царук абараніла кандыдацкую дысертацыю. У 1976 г. Іраіда Осіпаўна абараніла доктарскую дысертацыю, і ў 1978 г. ёй прысвоена вучонае званне прафесара. Кандыдацкая і доктарская дысертацыі прысвечаны даследаванням гісторыі і культуры Заходняй Беларусі. У 1973 г. выбрана на пасаду дэкана гістарычнага факультэта, якую займала да верасня 1986 г. У 1983 г. узначаліла кафедру гісторыі БССР, была выбрана прафесарам гэтай жа кафедры, дзе працавала да снежня 1991 г., да выхаду на пенсію. За час працы ў БДУ чытала лекцыі па гісторыі КПСС, гісторыі БССР, гісторыі і культуры Заходняй Беларусі. Усяго мае каля 100 публікацый. Падрыхтавала 30 кандыдатаў, шэсць дактароў гістарычных навук.
